قصة شيبه عماني لا يفوتكم !!!
هذه قصة شيبه يسوق تكسي.... شفت هذه القصه في جريدة ((الاسبوع)) وحبيت اعرضها لكم
((القصة بالهجه العمانيه))
الشيبه وهو يقص لكم الحكايه:::::::------
باغي أخبركم عن سالفة ظريفة من مشاوير هذا التاكسي المحوفر اللي ما يجيب غير المشاكل و الهموم، يوم الثلاثاء الماضي قلت أروح السيب اترزق من زمان ما رحت ذاك المكان، المهم رحت وخلصت أموري ولما جاي باغي أطلع أحصل شباب ثنينة يأشروا عند دوار اللوامي وكنت مستمتع في وقت العصر بأغاني علي بن روغه اللي تذكرني بحلاوة زمان أول، وقفت وقصرت المسجل وكالعادة: "أبو الشباب وين واصل؟"
وأقول في نفسي: تو هاذيلا الشباب ما حافظين إلا هاذي الكلمة ما يشوفو إن الشعر الأبيض صابغ نص الراس والنص الغيرة صلعة، وهيبة الشوارب واللحية، وين ما أروح ينادوني أبو الشباب؟؟؟
قلتلهم: "تفضلوا يا أولادي وين تريدوا؟" قالوا: "سيتي سنتر لاه"
قلتلهم:"تفضلوا."
وأضني ما يحتاج أخبركم عن لبسهم تعرفوا شباب مال اليوم وخاصة أوين عايشين في مسقط ما مبقيين شي ما معلقينة حتى السناسل، بالمرة طلعنا وجلسوا يثرثروا كلمة عربي وبعدها عوجة وعشر كلمات كوكتيل ، كل ما فهمتة انهم رايحين يشتريوا موضة جديدة من اللبس الشبابي اللي نازل في السوق هاذيلا اليومين الله يستر بس وعند جسر الخوض في واحد واقف ما عرفتة حسبته هندي... فسألته: "تفضل صديق وين في ريد روح؟"
وفاجأني بعصبية: "اية انته مالك انته؟؟ ود خالة أنا عماني كماك"
قلتله: "اسمحلي يالطيب ما عرفتك، الله يهديك ايش هذا اللبس اللي لابسنة حسبتك هندي"
بعدني ما كملت كلامي طشوا الجماعة الثنين اللي فالخلف وقالوا: "دوكم كيف هذا الشايب ما يعرف الستايلات الجديدة؟!!!"
الثالث ركب جنبهم وقاموا يتعرفوا على بعضهم (("""مو أخبار ولاد خالة؟ اكية مرة تمام وين ساكن؟ الخوض لاه""")) سوالف وربشة وكل واحد معجب بملابس ربيعه وسال وجواب عن آخر ستايلات والموضة ( الرذولية)، لين ما وصلت الحيل وعلى الشارع رجال باين عليه نشمي ، دشداشة بيضا وعلى الراس تاج بمصر ترمه والخنجر على صوب تتوسط الخصر والخيزران موشحة بالفضة وقفتلة والشباب الصيع بربشتهم.
قالي: "واصل برج الصحوة أخوي؟" قلت: "هيه نعم تفضل"
بعد ما مسكر الباب،(("" كيف حالكم الحمدلله بخير هات علومك، ماشي الا الخير ما خابرت بشي، أبدا، من صوبك شي علوم، تسلم وتدوم، ما شي أخبار؟ يسرك الحال""))
وأسمع الشباب يقهقهوا وقولوا:""" أوين شي علوك دوكم الشايوب في مسقط وانلكس الفوطة على صوب ومعلق شرشف تحت الكندورة ورابط كرشة بالحزام الأسود ويتقشع بعصا البلياردو...كاههههههه""
ومن خلال هاذي السالفة اللي صارت معي داخل المشبكة اللي دايما أترزق منها بغيت أنبهكم لملاحظة مهمة يمكن انتوا غافلين عنها وهي انه هاذي الايام وخاصة في مسقط قليل تشوف حد من الشباب لابس دشداشة عمانية أغلبهم بنطلون اللي يسموه جنز وفالينة ضاغطة على الجسم وكبوس ، وأشياء عجيبة وغريبة على مجتمعنا والظاهرة تزداد يوما بعد يوم حتى صاروا أطفالنا ما يعرفوا شي اسمة وزار و دشداشة وكمة ومصر وعاد انتوا كيفكم ولا أنا مستحيل أنتنازل عن هذا اللبس الغاوي اللي طالع علي كشخة وهيبة. وانتوا يا الشباب لازم تتقيدوا وتحافظوا على هذه الملابس الغاوية